Олимпиада - жеңістің шыңы!

Қаңтар айының 4-7 күндері аралығында Өскемен қаласындағы дарынды балаларға арналған Жамбыл атындағы облыстық мамандандырылған мектеп-гимназия-интернат және С. Аманжолов атындағы Шығыс Қазақстан мемлекеттік университетінің базасында жалпы білім беретін пәндерден республикалық олимпиаданың облыстық кезеңі болып өтті. Олимпиаданың басты мақсаты – оқушылардың ғылымға деген қызығушылығын дамыту, пәндік білімдерін тереңдету, дарынды балаларды анықтау, дамыту, қолдау. Жарма ауданының намысын қорғаған 30 үміткердің ішінде Георгиевка орта мектебінің оқушылары да өз білімі мен біліктілігін сынауға осы олимпиадаға аттанған болатын. Олар 10 сынып оқушылары Оразхан Сағи мен Самекенов Данияр, 11 сынып оқушылары Рымханова Айдана, Мамбетниязов Аймұрат және Даниярова Асима.

Білім сайысында облысымыздың барлық аудандары мен қалаларынан қатысқан 690 оқушының ішінде бабы мен бағы қатар шапқан оқушыларымыз өте жақсы нәтижелер көрсетіп, барлығы да жүлделі орындарға ие болды. Нақтырақ айта кетсек жүлделі III орынды Оразхан Сағи математика пәнінен мұғалімі Мукажанова К.Ш., Самекенов Данияр география пәнінен мұғалімі Қайырбеков Е.Б., Даниярова Асима орыс тілі пәнінен мұғалімі Ахметжанова Г.М., II орынды Рымханова Айдана қазақ тілі пәнінен мұғалімі Айтмурзакова Н.Д. және Мамбетниязов Аймұрат информатика пәнінен мұғалімі Мурзагулова М.К. жеңіп алып мектебіміздің мәртебесін бір көтеріп тастады. Барлық олимпиада жүлдегерлерін жеңістерімен құттықтаймыз.

Оқушылардың олимпиадаға дайындығы кезінде баланың өз қабілетіне деген сенімділік сезімін оятып, қолдау көрсеткен ата-аналарға алғыс білдереміз!

Ұстаз қызметінің нәтижесі де, таразысы да білім берген оқушыларының жетістігі десек, осы оқушыларға білімнің нәрі мен ғылымның жетістіктерін бойларына сіңдіре білген ұстаздар қауымына шығармашылық табыстар тілейміз!